A 1ma guerra : u maceddu - A 2da guerra : a risistenza - A 2da guerra : libarazioni

A 2da guerra mundiali 1939 - 45 :
libarazioni

À i 80 000 suldati taliani si sò aduniti, toccu ghjugnu di u 1943, 14 000 suldati alimani di a divisioni Reichsführer SS arrughjunata in Sartè. S’aghjugnini in più 2 000 omi sbarcati da a Sardegna cù u so armamentu maiò.

L’8 di sittembri, l’armistiziu talianu hè palisatu nant’à a BBC : era statu firmatu in Cicilia 5 ghjorni nanzu. U 9 di sittembri hè missa in baddu l’insurrizzioni da u Fronti Naziunali. L’ordini hè lampatu da Maurice Choury davanti à a Prifittura d’Aghjacciu. Dui tempi ind’a libarazioni :

L’alimani cercani tandu di lascià a Corsica suttana pigliendu a strada di Bastia da imbarcà versu l’Italia di u Nordu. Parechji cumbatti upponini l’alimani à i libaradori nant’à a strada Bunifaziu-Bastia. L’armata di libarazioni hè cumposta di risistenti, gumiè marrucani, suldati di u battaglioni « de choc » è suldati taliani (20% di i Taliani sò avà alliati à a risistenza). L’amiricani bumbardani.

Bastia hè u locu di cumbatti duri assai. L’ultimu suldatu alimanu si ni và u 3 d’uttrovi di u 1943, lascendu darettu à eddu 450 morti, 100 carri armati, 5 000 veiculi è 400 prighjuneri. Da u cantu nustrali, si conta 637 morti taliani, 170 patriotti corsi è 75 suldati par ciò chì hè di i truppi francesi

A Corsica ghjova di basa aeria cù 17 airuporti acconci da l’Amiricani, po di basa pà u sbarcamentu alliatu in Pruvenza d’aostu 1944. Cuntaremi tandu più di 2 000 batteddi prisenti.

DA TENA À MENTI

U mesi di sittembri di u 1943, a Corsica fù u primu dipartimentu francesi libaratu da l'accupazioni taliana è alimana. Issa libarazioni fù fatta da i risistenti corsi, aiutati da truppi scalati d'Africa è una parti di l'anziana armata d'accupazioni taliana.