A IIIza Ripublica

Hè a più longa di i 5 ripublichi postu ch’edda hè durata 70 anni, da u 1870 à u 1940 !

Hè l’epica di l’unificazioni linguistica. L’opara fatta à a scola, cù i leghji Ferry di 1881/1882 ghjova à l’unità naziunali. A scola diventa di gratisi, laica po ubligatoria. A cuscrizzioni (1889) parmetti di mischià a ghjenti di tutti i rughjoni è di tutti i classi suciali.

Hè cusi ch’eddi sò intagrati à u spaziu naziunali francesi tutti i pruvinci è i so populi. Ugnunu si pò rivindicà di i simbuli di a Ripublica chì sò avà di tutti :
A bandera cù i trè culori, a festa di u 14 di lugliu, a Marsigliesa com’è innu naziunali po u bustu di Marianna.

In Corsica, l’epica hè quidda di u travaglioni di i stitutori chì sò veri « hussards de la République ». A lingua francesa hè imposta è sò insignati di ditu i guai di a Corsica : a viulenza, a vindetta, u  sistema clanistu di partitu è contrappartitu, l’imbrogli alitturali, l’agricultura arcaica, u mancu di sviluppu industriali.

A scola, ubligatoria da 6 à 13 anni accogli solu 90% di i masci è 70% di i femini ! U prima Cirtificatu hè datu ind’u 1881 : a riescita tocca l’8 à i 10%. Quiddi chì l’ani vedini l’apartura bramata di i porti di l’amministrazioni.

Stu mudeddu d’intigrazioni hè dighjà criticatu assai ind’u 1896 da l’autunumisti di « A tramuntana », ghjurnalettu in lingua corsa fattu da Santu Casanova, pueta rinumatu.

A Ripublica hè matirializata da ciò ch’edda faci pà u prugressu (scoli, camminu di farru, stradi, funtani…) ma dinò da i so raprisintazioni : un leghji di u 1884 imponi à tutti i cumuni d’alzà una Mirria induv’edda svintularà a bandera francesa. I busti di Marianna pigliani a piazza di quiddi di Napulioni u IIIzu. A cosa si farà pianamentu è bè chì solu 11% di i cumuni t’ani un bastimentu municipali.

DA TENA À MENTI

Durò 70 anni a terza Ripublica. In Corsica, hà lasciata a so stampa nant'à u seculu cù i leghji aduprati è i simbuli scelti : a scola diventa di gratisi, laica è ubligatoria po sò fatti stradi, funtani è camminu di farru. A lingua francesa hè imposta quant'à i simbuli ripublicani : a bandera à trè culori, a festa di u 14 di lugliu, a Marsigliesa è u bustu di Marianna