Autunumisimu è naziunalisimu - A Cullitività Tarritoriali di Corsica - L'Univirsità di Corsica

Autunumisimu è naziunalisimu

I rivindicazioni d’autunumia ùn sò d’eri. Vani liati à u cambiamentu di sucità impostu da l’intigrazioni à a Ripublica francesa. I primi rivindicazioni sò à prò di a lingua corsa nigata da i leghji di a 3za Ripublica. Ricusendu a sparizioni di a so lingua ind’u 1896, Santu Casanova, pueta natu in Azzana, lampa u prima ghjurnali in lingua corsa scritta : A Tramuntana. Ci passarà dinò u pueta Petru Rocca chì lamparà dopu guerra u ghjurnali A Muvra ind’u 1920.

Hè fattu ind’u 1923 u Partitu Corsu d’Azzioni chì divintarà versu l’anni 1926 u Partitu Corsu Autunumista. Più s’avvicina a siconda guerra mundiali è più Mussolini faci prissioni. Una parti di i scrittori di a Muvra è di i militenti di u PCA pigliani i pratesi fascisti. Certi si dicini avà indipindintisti. Toccu a 2da guerra mundiali, u Statu faci sarrà a stampa di a Muvra. Rocca hè ruvinatu po cundannatu, cù parechji altri, à a prighjò ind’u 1946. Appena cappiatu, faci un’academia da difenda a lingua corsa

L’idea d’autunumia pari ch’edda fussi divintata un irisia. Nimu ni parla dopu guerra senza essa paragunatu à i fascisti. L’anziani autunumisti sò cunsidarati com’è traditori. I rivindicazioni autunumisti voltani in l’anni 60 è certi muvimenti s’aduniscini da crià l’ARC (Azzioni Righjunalista Corsa). Nasci tandu u Naziunalisimu. Ghjugni l’affari d’Aleria. U capu di l’ARC cù una duzina di militenti armati di fucili accupani a cantina d’un pedineru accusatu di fà un vinu trafficatu è di tuccà suvvinzioni. U Guvernu manda u 21 d’aostu 3 squatrigli di ghjandarmaria cù l’automitragliosi è l’ilicotteri ! L’ordini d’assaltu datu, dui ghjandarmi sò tombi.

Accantu à sta strutturazioni di u muvimentu autunumistu, i ghjovani corsi chì ricusani a filusuffia di l’ARC è cercani un troncabracciu cù u Statu francesi, creani u Fronti di Libarazioni Naziunali di a Corsica ind’u 1976. A Corsica cunnosci anni è anni d’attintati.

I muvimenti si facini di più à in più rimprovari nant’à a visioni di a lotta. L’ARC po l’APC sceglini a via ligali è l’autunumia interna, u FLNC (muvimentu clandistinu) prumovi una stratigia di contraputeri ligali è di lotta di libarazioni naziunali. U naziunalisimu piglia a dicisioni d’impignà si ind’i strutturi pulitichi è suciali. Nasci cusì a Cuncolta Naziunalista Corsa, partitu ligali po u Sindicatu di i Travagliadori Corsi è u Sindicatu Corsu di l’Insignamentu. Naziunalisti è Autunumisti entrini à l’Assimblea di Corsica.

Toccu u 1989, i naziunalisti di a lotta di libarazioni naziunali si spiccani in 3 muvimenti ligali è clandistini (Cuncolta Naziunali – Accolta Naziunali Corsa – Muvimentu Pà l’Autoditarminazioni / FLNC canal historique – FLNC canal habituel – Risistenza). Nasci di 1994 una guerra fraticidi trà naziunalisti cù parechji morti d’ogni cantu.

1998 : u Prifettu Erignac hè tombu in Aghjacciu

1999 : a guerra naziunalista si compii cù una riunioni tamanta di tutti i naziunalisti ind’u Fiumorbu

Oramai, i dui branchi di u Naziunalisimu (à favori d’un’autunumia nanzu à un’antra avanzata o à favori di l’indipindenza) sò raprisintati à l’Assimblea di Corsica accantu à i partiti « tradiziunali » di manca è di dritta.

DA TENA À MENTI

In Corsica, a rivindicazioni naziunalista si sviloppa di parechji maneri da u sittanta in qu. Uni pochi di i so militenti adoprani l'azzioni clandistina a viulenza.