A 1ma guerra : u maceddu - A 2da guerra : a risistenza - A 2da guerra : libarazioni
A 2da guerra mundiali 1939 - 45 :
a
risistenza
Dopu à u discorsu di De Gaulle in Londres u 18 ghjugnu di u 1940, s’urganizeghja di più a risistenza di l’internu è di l’infora. A Corsica si trova tandu in zona libara, sott’à u Guvernu di Vichy iniziatu da Pétain.
L’11 di nuvembri di u 1942, circhendu di ghjuvà si di a sbarcata alliata in Africa di u Nordu, Hitler lampa u pianu Attila : l’armata soia entri ind’ a zona libara è i taliani sbarcani ind’è noi. A Corsica hè tandu accupata da l’80 000 suldati di u ghjinirali Magli. Si multiplicheghjani i riquisizioni, l’arristazioni è i cundanni.
Aiutati da u BCRA, i risistenti corsi ricevini armi, munizioni è posti imittori traspurtati cù u sottumarinu Casabianca o paracadutati in lochi persi.
L’azzioni di a Risistenza hè chjara : rinsignamentu, mani data contru à i truppi d’accupazioni, diffusioni di ghjurnali clandistini com’è « le Patriote », manifistazioni contru à u Sirviziu di Travagliu Obligatoriu, impostu da l’Alimani, è chì imponi d’andà à travaglià dui anni in Alimagna da sustena u sforzu di guerra.
A riprissioni hè fatta da l’OVRA : Fred Scamaroni, arristatu u 17 di marzu di u 1943, si tomba ind’a prighjò di a citadedda d’Aghjacciu. Hè rimpiazzatu da u capitanu Paulu Colonna d’Istria. Ghjugnu di u 1943 : a fucilata di a « Brasserie nouvelle » in Aghjacciu vedi a morti di dui rispunsevuli di u Fronti naziunali : Andria Giusti è Ghjuliu Mondoloni. In tuttu, 475 risistenti sarani dipurtati ind’i prighjoni taliani è à mezu à eddi, 27 si ni murarani : Petru Griffi, Nunziu Benielli, Francescu Vittori, Ghjuvanni Nicoli, Ghjilormu Santelli… senza scurdà si di i menu cunnisciuti è di Daniela Casanova, morta in dipurtazioni in Auschwitz.
DA TENA À MENTI
