Autunumisimu è naziunalisimu - A Cullitività Tarritoriali di Corsica - L'Univirsità di Corsica

L'Univirsità di Corsica

À l’entri di u XVIII^mu seculu, ci era in Bastia un culleghju duv’è i Ghjisuiti insignavani a retorica è a filusuffia. Ma, à i ghjovani chì vuliani fà studii supiriori, li tuccava à parta in Italia  (Roma, Paduva, Napuli, Genuva, Pisa) o puri in Spagna. Parciò, l’idea di crià un’Univirsità in Corsica nasci à tempu schiattata a rivuluzioni corsa. A dicisioni di apra l’Univirsità hè pigliata à a Cunsulta di Corti di u 1763. Hè aparta (1765) à tutti i ghjuvanotti è cù u scopu di furmà ghjenti capaci di piglià l’impieghi publichi chì accorrini à u ghjovanu Statu corsu. Era ind’una casa chì ùn asisti più, nantu à a Piazza Paoli di Corti.

I prufissori sò sei, po novi. Scelti da Paoli, sò tutti rilighjosi, franciscani soprattuttu, è u so insignamentu hè piuttostu cunservatori. U rittori n’hè Francescu Antone Mariani, un franciscanu di Curbara prufissori di drittu civili, di drittu canonicu è d’etica. Ci hè dinò Ferdinandi, un cappuccinu prufissori di retorica, Leonardu di Campuloru, prufissori di filusuffia è di matematica è Bonfigliu Guelfucci, un Servu di Maria amicu è sicritariu di Pasquale Paoli. Facini corsu à trecentu studienti, ciò chì hè assai par l’epica. L’insignamentu hè di rigalu pà i studienti, ma i studii sò pagati cù i soldi di a Ghjesgia è i rivinuti fundarii di un pricoghju di Statu in Antisanti. Uni pochi di studienti toccani borsi da pudè si allughjà in cità, inveci chì l’altri stani à u cunventu San Francescu, duv’eddi poni infattà à Paoli quand’eddu dormi culà.

Di 1981, sott’à a prissioni pupulari, apri dinò i so porti. Hè cusì chì i ghjovani corsi ùn sò più in l’obbligu di piglià i stradi tanti cari chì portani in Nizza, Ecchisi-Marseglia o Parighji. Più di 4 000 studienti ci sò scritti ogni annu è suvitani insignamenti diversi ind’i so parechji parti :

• Istitutu d'Amministrazioni d’Impresi (IAE)
• UFR Drittu, Scenzi Aconomichi è Ghjistioni (SEG)
• UFR Lettari, Lingui, Arti, Scenzi Umanu è Suciali (SHS)
• UFR Scenzi è Tecnichi (USC)
• Istitutu Univirsitariu di Furmazioni di Maestri (IUFM)
• Istitutu Univirsitariu di Saluta (IUS)
• Istitutu Univirsitariu di Ticnulugii (IUT)
• Paoli Tech : apartura d’un Scola Inginieri Pulitecnica d’uttrovi di u 2011(EIP).

DA TENA À MENTI

L'Univirsità di Corti apri prima di 1765 sott'à u ghjiniralatu di Pasquale Paoli. Fù chjosa da i Francesi ind'u 1769 po aparta dinò ind'u 1981 sott'à a prissioni pupulari. Hè autonuma dipoi u 2009 è pruponi insignamenti parechji liati à u sviluppu acunomicu di l'isula.