I Bizantini

Dopu avè libaratu u paesi di i Vandali di pessima riputazioni, i Bizantini fermani  200 anni in Corsica. Più và, più pensani à u prufitu è micca à a ghjenti di u locu. L’abitenti sò carchi à impositi è ancu presi in schiavitù. Si dici chì, par pudè pagà l’impositi, i Corsi vendini i so ziteddi ! L’isula sarà invadita da i Goti (circa 549) una quindicina d’anni.

Santa Ghjulia hè marturiata in Capicorsu versu u 553. Ricusendu di rinuncià à u so Diu unicu, l’africana hè turturata è mori.

I Bizantini ripigliani a mani è veni tandu u tempu di a strutturazioni di l’isula.

Lasciarani u ricordu d’una riurganizazioni di a Ghjesgia in Corsica, spartendu la in 5 Viscuvati chì vani liati à una cità : Nebbiu (Turrenu), Mariana (Marinianis), Sagona (Cœnicum), Aleria (Colonia Iulii) ed Aiacciu (Agiation).