A Corsica rumana

À u principiu di u IIIu seculu nanzu à Cristu, a Corsica hè liata assai à i Punichi. A guerra trà Cartaghjini è Roma porta à Lucius Cornelius Scipione à l’assaltu d’Alalia (Aleria in latinu) in 259 nanzu à C. I Rumani imponini a so duminazioni à l’isula sana po levani assai impositi. In 231 nanzu à Cristu, facini di Corsica è Sardegna una pruvincia sola sott’à u cummandu militari d’un Pritori. Sarani spiccati i dui isuli sott’à Augustu, in l’annu 6.

I rivolti contru à i Rumani sò parechji : 191 nanzu à Cristu, 2 000 isulani sò tombi ; 172 nanzu à Cristu, 7 000 morti è 1 700 prighjuneri mandati in Roma. Di più, à a Corsica li tocca à pagà un tribbutu di centu tonni di cera ! A cunquista di l’isula finisci in 111 nanzu à C. cù l’ultima rivolta cunnisciuta.

A carta di Ptulemeu, à u IIu seculu, conta 31 cità (17 nantu à a costa è 14 à l’internu) è parla di 12 populi chì campani ind’i borghi, vali à dì senza drittu di stabbiliscia si ind’i cità.

A rumanizazioni si stendi partendu da i porti impurtenti : Aleria, Mariana, Aiacciu, Sagona o Calvi. U paisaghju cambia cù i culturi di a vigna, di l’alivu è di u granu fatti à l’usu rumanu. Certi anziani di i lighjoni sò arrughjunati nant’à i tarri di Mariana (da Marius) o d’Aleria (da Sylla). A muneta è a lingua latina pigliani a suprana nant’à i vechji usi corsi fendu di l’isulani Corsi-Rumani.

A Corsica pruduci tandu :

Parti è più di sti prudutti sò mandati in Roma è certi sò beddi appriziati nant’à i tavulini di i patrizii rumani (nobuli).

DA TENA À MENTI

Dopu à cent’anni di « pacificazioni », i Rumani sò maestri di a Corsica par 7 seculi. Ci portani a so lingua, i so rilighjoni, i so culturi è u so modu di campà. Tandu , i "Korsi" diventani i Corsi.
Pà u più, l’isula appruvisteghja i rumani in legnu è in prudutti da calfatà i batteddi : peci, rasgina è cera.