Cartaghjinesi, Etruschi è Grechi in Corsica

I Grechi di Fucea, nant’à a costa  à punenti di l’Asia Minori, sò troppu numarosi pà u tarritoriu di a so cità. Una parti s’hà da isilià è fundà culunii da stabbilì si. Versu 600 nanzu à C., facini à Massilia.

Sicondu Erodutu, i fucesi s’arrughjuneghjani in Corsica versu 565 nanzu à C., ind’una cità ch’eddi aviani rifatta è chì si chjamava Alaliè. Ni facini un fondacu chì ghjova da scalu trà Focea è Massilia. A prisenza di una civilizazioni « classica », chì maneghja a scrittura, faci entra a Corsica ind’a storia.

Alalia diventa un portu chì tocca i vii cumirciali di u Maritarraniu. Assai ughjetti furisteri trovi ind’a nicropuli prirumana cunfermani u cummerciu cù l’Atticu è l’Etruria.

Mentri più di 300 anni (sin’à a cunquista rumana di u 259 nanzu à C.), Alalia ferma un fondacu è ghjova da scalu pà u cummerciu punicu (Cartaghjinesi), grecu è etruscu chì cercani di piglià si ni a suprana. A battaglia d’Alalia, nant’à u mari, impidisci l’arrughjunera di guasgi 5 000 famigli fucesi.

DA TENA À MENTI

Liata assai à i Punichi, a Corsica vedi sbarcà Fucesi chì facini o torrani à fà a cità d’Alaliè, nant’à a costa uriintali. Sta cità ghjova da fondacu mentri 300 anni. Etruschi è Cartaghjinesi impidiscini una sbarcata nova di i Fucesi battendu li nant’à u mari à a battaglia detta «d’Alalià».