A Corsica indipindenta
Ind'u 1757 sbarca Pasquale Paoli, numinatu Ghjinirali, chì piglia a suprana nant’à tutti l’altri è s’imponi cù a forza. U so « regnu » dura dodici anni è a so opara hè tamanta. Ghjenuva chjama a Francia à l’aiutu. Dopu à a battaglia di Ponte Novu, ripiglia Pasquale i stradi di l’isiliu versu l’Inglitarra. A Francia di Louis XV accampa u paesi è u teni.
L’azzioni di Paoli :
Ghjuntu à u puteri, Paoli pò metta in baddu i soi idei à prò di a Corsica, mischiendu « mudirnità » è usi anziani. Sà eddu chì u paesi si devi sviluppà è chì stu sviluppu passa pà un puteri forti è una ghjustizia… ghjusta. A viulenza hè un ustaculu à a mudirnizazioni. A ghjustizia paulina firmarà ind’i menti com’à una ghjustizia senza tularenza : quiddi chì sò indiati ind’i vindetti (chì strughjini u paesi) sò appiccati !
- Faci vutà in cunsulta a custituzioni di a Corsica chì sarà un regnu cù una righjina, a Verghjini Maria. À i cunsulti, chì t’ani u puteri di ricusà ogni dicisioni è ancu u Ghjinirali, tutti i pruvinci (Pievi) di l’isula sò raprisintati.
- Corti diventa a capitali
- Metti u Puteri asicutivu è ghjudiziariu à u Palazzu Naziunali
- Metti u Puteri lighjislativu à u cunventu San Francescu
- Metti in baddu a Zecca, in carica di batta a muneta corsa
- Apri un’Univirsità in Corti
- Da impidiscia u cummerciu di i Ghjinuvesi in Calvi, faci a cità è u portu di Lisula
- In più di l’armata pupulari, faci un’armata prufissiunali (a truppa pagata) cù 1200 suldati scumpartuti in 30 cumpagnii
- Faci una marina di guerra
- Hè incuraghjita a cultura di u castagnu, di l’alivu, di a vigna è di u pomu
- U travagliu ind’i mineri ripiglia (piombu, farru, ramu) da fà armi, arnesi è muneta
- Ci hè una stamparia naziunali (in Cervioni po in Corti) chì stampa u ghjurnali « Ragguagli dell’isola di Corsica » spiichendu à u stragneru l’azzioni di i Corsi.
- L’armuratura è a bandera corsa sò ufficiali
