Indu stu mondu giratu ver di u tuttu numericu, u manuale deve firmà un puntellu impurtente di l’amparera è u cuntattu incù a carta ùn deve micca sparì da u mondu di a s ola è da quellu di l’insignamentu in generale. In più di u so utule educativu, un libru hè sempre fattu per esse manighjatu è sopr’à tuttu per esse quì.

Sempre in leia stretta stretta incù i prugrammi, stu manuale si scrive in u filu direttu di quellu per e scole di quarta da incuragì a spressione, ma dinò aiutà u zitellu à apre si à altre varietà è à altre lingue è culture. Fattu per i zitelli da u livellu A2 à u livellu B2, ch’elli sippianu in ozzione, LV2 o in e filiere bislingue, stu libru l’apprunterà à una seconda generale o prufeziunale.

Mudernu hè, incù e so rubriche nuvelle, da u studiu di ducumenti sunori à a literatura, passendu per i percorsi da fà scopre a diversità di l’attività ecunomiche, suciale è culturale d’ind’è noi. Scurdà si, ùn s’hè scurdatu d’esse dinò in leia incù i prugrammi di storia è giugraffia è quelli d’arte, da demucratizà l’interdisciplinarità è avvià u sculare ver di u brevettu. Un manuale ùn nasce mai cusì à casu è dumanda assai travagliu è impegnu. Ch’elli ne sippianu ringraziati l’autori ma dinò l’editori per i sculari d’oghje è di dumane.

Ghjacintu Ottaviani, Ispettore Accademicu-Ispettore Pedagogicu Regiunale di LCC

À via di a lingua 3ème - Audios